ग्व नेवाः नेतातय्गु सः

जेठ १५ गते- संविधान सभा विघटन जुल । दुःखया खँ । थ्व दुःख प्वंकेगु इ चान्हय् लात । तर नेवाःतय् न्हृयः मवः । विघटन हे जुइधुंकाः नेवाः न्हृयलुवाःतय्सं छु बिचाः यात जुइ - आः नेवाःतय्गु आन्दोलन छु जुइ धकाः नेवाः न्हृयलुवातय्के न्यनेगु कुतः याना । तर छुं ठोस खँ लुइकेमफुत । यक्वं नेवाःतय् न्हृयः मवःथें नेवाः न्हृयलुवातय् नं न्हृयः मवः जुइ धइगु जिमिगु मनसुवा । अले जनताया न्हृयः मवइगु व नेताया न्हृयः मवइगु पाइ थें नं जिमित ताःगु खः, तर वास्तविकता खास मपाः । संविधानसभा विघटन जुइधुंकाः सुथय् वइगु पत्रिकाय् नेवाःतय्गु धापू छु दु आन्दोलनकारी नेवाःतय्गु नितिं धकाः न्यनेगु कुतः याना । लिसः मलू । शायद थौं लिसः वइ जुइ । तर लिसलय् आश यायेमाःगु खँ धइगु नेवाःतय्सं याःगु शक्ति पर््रदर्शनय् चक्कं दबू थ्वयेक पिज्वःगु राज्य घोषणाया सः सुइ लाकि मसुइ - ज्या लगेमजूपिं सभासद्तय्त लकां माः क्वखायेकेगु ज्याया उद्घोषयाःपिन्सं थुगु ज्या याइ लाकि मयाइ । थ्व मात्र छगू क्वाकेगु ज्याभः खः बाय् धात्थें नुगलं पिज्वःगु सः खः, इलं अवस्य क्यनी ।